السلام عليكم ورحمة الله وبركاته
أنا بشمهندس محمد الفقي، أهلًا بيكم جميعًا، يارب تكونوا بخير وفي أفضل حال.
كنت بفكر إني أستخدم الأتمتة إنها تجيب لي حسنات بشكل مستمر وبدون مجهود مني، هو إعداد مرة واحدة فقط، ويفضل يشتغل مرات عديدة.
ف عملت صفحة أجر لا ينقطع على فيس بوك [https://www.facebook.com/profile.php?id=61585386947319](https://)
إني أعمل أتمتة لمنشورات يومية تنزل على الصفحة، زي أذكار مختلفة وبوستات للصلاة على سيد البشرية صلى الله عليه وسلم، وأي حد يقرأها أو يشاركها يكون لي ثواب وأجر في ذلك.
بعد كده قلت: ليه أستفيد لوحدي في الثواب؟
فجت في بالي فكرة إني أخلي الناس تشاركني الأجر والثواب من خلال فورم عملته على موقع أجر لا ينقطع [https://ajr-layanqate3.netlify.app/](https://)
في أكتر من نوع من المشاركة (حديث، ذكر، دعاء، آية، فائدة)، الشخص يختار منهم، وبعد كده يضيف النص اللي عاوز يشاركه، ويضغط على:
أتعهد أن المحتوى لائق ومحترم
وبعد كده زرار أرسل ذكرك ✨
بعد كده أنا في صفحة الأدمن أراجع المشاركات دي وأقبلها لو صحيحة ومفيش فيها أي مشاكل، وممكن أعدل عليها من حيث الكتابة والأخطاء الإملائية.
ودي كانت البداية، وبعد كده المنشورات دي بتتنشر على صفحة أجر لا ينقطع على فيس بوك وإنستجرام بشكل تلقائي.
ولو مفيش أي مشاركات جديدة، نبدأ نشارك البوستات القديمة مرة تانية.
وعملت صفحة المجتمع بحيث المشاركات المقبولة تظهر فيها على الموقع، ونزود ظهور المشاركات بحيث الثواب يزيد أكتر وأكتر.
وفي صفحة للأذكار فيها بعض الأذكار، وكمان مسبحة إلكترونية.
وضفت صفحات الذكرى، ودي مخصصة لتذكر المتوفين وأعمالهم الصالحة اللي عملوها في الدنيا، وأدعية ليهم، وسورة يس، وكمان تسبيح للمتوفي.
وفي صفحة شهداء غزة، ٧٢٬٨٣٥ شهيدًا، بنعرض بيانات الشهداء المتوفرة، وكمان توزيع الشهداء حسب الجنس، وتوزيع الشهداء حسب الفئة العمرية، والتوزيع حسب عقد الميلاد، وكمان البحث عن شهيد.
وكمان 🕊 شهيد اليوم، وده بيتم نشر له بوست على الصفحات بشكل يومي تلقائي لحد من الشهداء، عشان الناس تفتكره وميكنش مجرد رقم.
وأخر صفحة في الموقع هي مصمم البطاقات، اللي تقدر من خلالها تصمم بطاقات بشكل إسلامي، زي دي:
الموقع مغلق المصدر، وتوقفت عن العمل عليه وتطويره آخر مدة، ومكانش فيه زوار.
برغم كل المميزات الموجودة فيه، وفكرة إنك تكتب حاجة مرة واحدة تشارك بيها، زي دعاء أو ذكر، ويفضل ينتشر تلقائي بدون مجهود منك، وتاخد ثواب كل مرة حد يشوفه أو يشاركه، فكانت فكرة جميلة، لكن لم تُكلل بالنجاح اللي كنت متوقعه.
الحمد لله الذي هداني لهذه الفكرة، والحمد لله نفذتها، والنتيجة منه وحده.
كنت بفكر أجعل المشروع مفتوح المصدر، أو حد يشارك معايا في تطويره، بحيث نقدم أفضل شكل ممكن منه، ويكون ذا أثر ومفيد وصدقة جارية لي ولكم.
فلو حد مهتم إنه يشارك في تطويره، أو عنده أفكار لتطويره، ممكن يشاركها معايا.
أو يرسل لي رسالة على واتساب من خلال الرقم ده +201050263342
آسف على الإطالة.
شكرًا ليكم.
